5 سنين بيتعرض على منتجين مصر كلهم ومحدش وافق.. محمد دياب يكشف سرًا عن أشغال شقة جدًا
كتبت/ مي السايح
كشف الفنان محمد دياب عن تفاصيل ما قبل عرض مسلسل أشغال شقة، والذي عانوا بسببها المخرج خالد دياب والمؤلفة شيرين دياب، كما كشف عن سرًا لأول مرة وذلك بعد نجاح المسلسل نجاحًا ساحقًا.
كتب محمد دياب عبر حسابه الرسمي على الفيسبوك: “الحمد لله أشغال شقه للسنه التانيه ينجح نجاح ساحق، بس ورا النجاح ده قصه.
اشغال شقه ده لمده خمس سنين بيتعرض علي منتجين مصر كلهم ولكن مكانش فيه حماس ليه، تقريبا معظم ممثلين مصر رفضوه رجاله وستات، ولما مره نجم كبير تحمسله ومضاه فضل يطلب تغييرات لدرجه إنه في الآخر طلب إن شغل البطل يتغير وتتشال فكره الشغالات!”.
وتابع: “في ناس مكانتش عاجباها الفكرة وناس كانت شايفه اننا بنكتب جد فمش هنعرف نعمل كوميدي، وناس عايزه الفكره بس اللي يخرجها حد تاني غير خالد”.
واستكمل: “رد الفعل ده كان هيجنن خالد وشيرين، احساس صعب لما تبقي مؤمن بحاجه واللي حواليك مش شايفنها، ساعات ده بيشككك في نفسك، أربع سنين تعدي ومينزلش لخالد وشيرين أي مشروع، الضغط خلي خالد يقبل ان اشغال شقه يتعمل ولو بمخرج تاني”.
وتابع: “خالد لأي حد يعرفه هو اكتر انسان كوميدي تقدر تعرفه وأنا وشيرين كان عندنا قناعه انه من اشغال شقه هيطلع كوميديته الخاصه اللي هتكسر الدنيا، بصعوبة شديدة رجع خالد وشيرين يحاولوا ورا المسلسل، لغاية لما جه هشام ماجد اللي آمن بيه وبخالد كمخرج وجت شركة الإنتاج (آي برودسيرز) اللي هيأتله أسباب النجاح”.
واختتم حديثه قائًلا: “”أشغال شقة” نجح واستخدم توليفة كتابية مختلفة مش قايمة عالإيفيهات، وخالد كمخرج طلع عنده صوت وشخصية ورؤية بصرية باينة في كل مشهد، أنا طول عمري بتفرج علي كوميديا المسلسلات وابتسم كام مرة وأبقي مرضي، بس إن الواحد يضحك بصوت ولغاية لما بطنه توجعه وده يحصل كل حلقه، فمتخيلتهاش تحصل في مسلسل”.
وأضاف محمد دايب: “بالنسبالي المخرج والمؤلف الشاطرين هما اللي بيعملوا حاجه أحس إني معرفش أعملها وأنا لما بتفرج على “أشغال شقة” ببقي متأكد اني معرفش اعمل منه مشهد، فعلاً كل تأخيره وفيها خيره”.
