ورحمة أبويا الفيلم بتاعي.. مؤلفة فيلم الهوى سلطان تنفي الإدعاءات الموجهة إليها

كتبت/ مي السايح

نفت مؤلفة فيلم الهوى سلطان “هبة يسري”، سرقتها لفكرة الفيلم، وذلك بعدما أكدت مؤلفة أخرى بأن الفيلم فكرتها وكتابتها وتمت سرقته منها.

وكتبت هبة عبر حسابها الرسمي على الفيسبوك : “طب قسم بالله ورحمة أبويا في تربته أنا ما أعرف رشا الجزار دي ولا قريت أي ورق والفيلم ده فكرته عندي من تانية معهد سينما وفي نسخ منه مكتوبة من زمان جدا وعند ماريان خوري في المكتب ولو لسه الأفكار موجودة هتبقى في المعهد واتطورت على مدار سنين”.

وتابعت: “وبجد ده ظلم بين ومحاولة لسرقة فرحتنا بالفيلم غير مسموح بيها تماما، ودول اللي باقي من الورق قبل ما أرمي كم الورق اللي كتبته على مدار سنين وعموما اللي شاف سابع جار و شاف الفيلم ممكن يقارن هاتوا خبير خطوط بقى ولا جهاز كشف الكدب”.

وفي سياق آخر، كانت المؤلفة رشا الجزار إكدت بأنه تمت سرقة فيلمها، وبأنها مؤلفة الفيلم وكتبت: “في سبتمبر عام 2017 قمت بكتابة معالجة فيلم روائي طويل بعنوان (حبي الأول)، ودا كان اسم مؤقت للفيلم ومثبت عندي على الإيميلات والواتس آب بالتواريخ المراسلات للمخرجين والمنتجين في رحلة البحث عن إنتاج من حينها وحتى أشهر قريبة”.

وتابعت: “وكان المورال بتاعي، أن الحب ممكن يكون قريب منك جدا وأنت مش شايفة ولا واخد بالك منه لانك مسمية أي اسم تاني (صداقة، عشرة، جيره، اخوه … الخ)، مش شايفة مع أنه ممكن يبقي قريب منك جدا، ودا لأنك ملبسه امبريلا مختلفة في المسمى، يوم الخميس 7 نوفمبر الحالي، دخلت السينما عشان اشوف فيلم (الهوي سلطان)، ودا لأني بنتظر أي فيلم جديد ينزل السينما وبجري عشان أشوفه، وكنت متحمسه جدا لاني بحب منة شلبي وبشوف كل أعمالها”.

واستكملت حديثها : : “اتفاجئت أن قصة الفيلم كامله (باكد تاني كامله) مسروقة من قصة فيلمي (حبي الاول)، بكل التفاصيل.. مع اختلاف اللوكيشن والحوار عندي في قصتي كنت مسكنه البطل والبطلة في نفس العمارة في شقتين فوق بعض، بدون مبالغة لو ذكرت التفاصيل اللي عندي في قصتي واوجه التطابق بنها وبين اللي شوفته في فيلم الهوي سلطان”.

واختتمت حديثها : “التطابق هيتجاوز ال 70%، الفكرة والقصة وكل الأحداث الرئيسية بتفاصيل ما سيحدث مع الأبطال مسروقين من قصتي (حبي الأول) حاولت على مدار يومين اتواصل مع مؤلفة ومخرجت فيلم (الهوي سلطان)، لكنها لم ترد على تليفوناتي، مع اني بعتلها رسالة على الواتس وعرفتها بنفسي وطلبت اني اكلمها ضروري، ورجعت بعدها اتصلت بيها تاني مرتين ولم ترد، البوست دا فقط من اجلي انا ومن أجل حقي في الدفاع عن شغلي، وليس من أجل أي شئ آخر”.

شارك في بطولة فيلم “الهوى سلطان” منة شلبي وأحمد داود وأحمد خالد صالح وجيهان الشماشرجي وسوسن بدر، ومجموعة من ضيوف الشرف خالد كمال، نورين أبو سعدة، عماد رشاد، فدوى عابد، ومن تأليف وإخراج هبة يسري، وإنتاج شركة “سي سينما برودكشن” هاني نجيب وأحمد فهمي.