دنيا سمير غانم تتحدث عن فقدانها لوالديها في برنامج “بودكاست تايم”
كتبت/ بسمة غربية
كشفت الفنانة دنيا سمير غانم عن أصعب وقت مرت به بعد وفاة والديها الفنان سمير غانم والفنانة دلال عبد العزيز، مؤكدةً أنها لا تستطيع نسيان صورتهما وهما على فراش المرض.
وقالت دنيا سمير غانم أثناء ظهورها في برنامج “بيج تايم بودكاست”: “كانت مرحلة صعبة أوي أوي، الوقت حتى قبل الوفاة كان صعب والاتنين مع بعض، اللي مش قادرة أتخلص منه وعشان كده بشغل نفسي في الشغل صورتهم وهما تعبانين على طول موجودة معايا”.
أردفت دنيا: “شعور الفقدان مش بنقدر نتجاوزة الموضوع مش سهل، بعد التجربة دي اكتشفت أن الحزن مش زي ما بيظهر في الأفلام، كل إنسان بيحزن بطريقة”.
أكملت الفنانة: “أنا مثلًا من بعد أهلي كنت عايزة انزل اشتغل عشان أنا طول حياتي متبرمجة أن الفن يعني هما وأنا بشتغل بحس أن هما معايا طول الوقت، دا كان ستايل حزني أنا عايزة أغني وأمثل وأحس أنهم موجودين وأقف على المسرح وأحس أن الجمهور معايا”.
تابعت دنيا غانم: “إيمي مثلًا كانت العكس كان حزنها أنها تفضل مع نفسها مش عايزة حد ومش عايزة حاجة، أول عمل عملته كانت مسرحية في موسم الرياض مع حسن الرداد بعد زق مننا كلنا”.
استكملت الفنانة: “إيمي حزنها غيري، أنا كنت بطلع الحزن في الأغاني زي الأغنية اللي عملتها لبابا، ومثلا بدمع كتير وببقى غصب عني عايزة أعيط كتير بس جوا الموقف بمسك نفسي وبغني وبمثل وأقابل الناس، لكن هما جوايا”.
اختتمت دنيا حديثها: “محدش يحكم على حد ممكن إنسان حصل له ظرف كبير وراح حضر حاجة تانية ممكن يكون راح المكان دا علاج أو شغل، وفي ناس تانية مش بتقدر وتقعد وتحزن مع نفسها”.
