مي عمر: “دوري في نعمة الأفوكاتو من أكتر الأدوار إلي حبتها”
كتبت / أسماء حليمة
كشفت الفنانة مي عمر عن كواليس مسلسلها “نعمة الأفوكاتو”، والذي تم عرضه في موسم دراما رمضان 2024، وحقق نجاحًا كبيرًا فور عرضه على الشاشات.
قالت مي عمر في تصريحات تلفزيونية في برنامج “أسرار”: “نعمة من أكتر الشخصيات اللي حبتها، لأنها مختلفة في كل حاجة، في طريقة كلامها وهزارها وجرأتها وردودها على الناس وتفكيرها، وأنا حبتها واتعلقت بيها جدًا، وبحب شكلها جدًا ولبسها وهي شبه ناس كتير أعرفهم”.
كما علقت مي عمر التضحية التي قدمتها نعمة في المسلسل لزوجها قائلة: “فيه والله فيه كتير أوي بيعملوا كده، وما أقدرش أقول الست غلط، لأنه مش غلط على الست، لكن الغلط على رد فعل الراجل أنه استغل الموضوع غلط”.
تابعت مي: “فيه ناس كويسة وفيه رجالة كويسة ولو الراجل كويس يستاهل تعمل كده عشانه ليه لأ، مش غلط هو استخدم الموضوع بطريقة غلط، وفيه نماذج كتير موجودة مش بس في مصر، والست بتسافر وتشتغل وتبعت لجوزها فلوس وهو ياخد الفلوس ويتجوز عليها”.
أكملت مي عمر: “لما شاركت في الأسطورة، كانت فاتحة خير عليا وأكتر دور الناس عرفتني منه، وفضلت فترة كبيرة الناس بتقول لي يا شهد”.
أضافت: “أنا عملت أعمال كتير ناجحة بعده، لكن نجاح الأسطورة نجاح مبالغ فيه، وكنت بضايق أن ليه الناس بتندهني بشهد مع أني عملت أعمال بعده ناجحة، وكنت مرة بقول ليه يا محمد الناس بتقولي يا شهد، وقتها محمد سامي قال لي طبيعي، قلت له نفسي الناس تنهده لي باسم شخصية تانية”.
واصلت مي حديثها قائلة: “لما عملت لؤلؤ كنت مؤمنة به، وبحبه جدًا، وبحب كل حاجة فيه، وزعلت لما خلصنا تصوير، لأني كنت بحب لؤلؤ جدًا من وهي صغيرة لحد ما كبرت”.
تابعت مي عمر: “فجأة تحولت من شهد لـ لؤلؤ فهو ده النجاح اللي أنا عاوزه أحسه، لأن لما الفنان يقدم عمل وينجح نجاح كبير، لو قدم نجاحات تانية بعده بس أقل مش هيكون راضي ومبسوط”.
