الزمالك يستبعد زيزو من قائمة الفريق المستدعاة لمواجهة سيليتنبوش الجنوب غداً في الكونفدرالية الإفريقية
كتبت/ آيه النجار
اكد مصدر مطلع داخل نادي الزمالك أن الجهاز الفني للزمالك استبعد احمد مصطفى زيزو من قائمة الفريق النهائية المستدعاة لمواجهة سيليتنبوش الجنوب الإفريقي في ربع نهائي الكونفدرالية الإفريقية.
ويواجه الزمالك نظيره سيليتنبوش الجنوب الإفريقي، غداً الأربعاء على أرضية ميدان ستاد القاهرة الدولي، ضمن منافسات إياب ربع نهائي الكونفدرالية الإفريقية.
يُذكر ان، انتهى لقاء الذهاب بين الزمالك و ستيلينبوش، بالتعادل السلبي، في اللقاء الذي أقيم بينهما يوم الاربعاء الماضي.
وجاء ذلك، بعدما أصدر احمد مصطفى زيزو، بيانًا، يفتح النار على إدارة نادي الزمالك، ويوضح حقيقة رحيله عن الزمالك.
وكتب زيزو عبر “استورى إنستجرام”: “الحمد لله. أنا راجل بحترم كل الناس، لكن للأسف عدم ردى على المعلومات المغلوطة، والتزامي الصمت زاد عن حدة وكل ساعة خبر عن توقيع أو تجديد عقد زيزو وكل واحد بيغازل الشريحة اللي عايزها من الجمهور”.
أوضح زيزو: “بكل وضوح أنا لم أوقع لأى نادى سواء داخل أو خارج مصر. اللي حصل على توقيعي يتفضل يعلن، إذا كان كلامه صحيح، كمان اللى عنده دليل على توقيعى لأى نادى برضو يتفضل يطلعه على الملأ.. الناس لازم تعرف كويس”.
اضاف: “أنا بقدر جدا الكيان الكبير اللي أنا بلعب فيه، ولا يمكن أنكر فضله عليا. لكن فيه حاجة أنا مكنتش حابب أتكلم فيها خالص.. لأنه للأسف الأمور في الإعلام كلها في اتجاه واحد.. ليه محدش اتكلم عن حقوقي المشروعة زي أي لاعب في الدنيا”.
تابع: “ليه محدش اتكلم إن الناس سابتنى بقالها شهور طويلة ومش عايزين يجددوا عقدى، ليه محدش اتكلم عن المستحقات المتأخرة اللي ليا بقالها كثير. ومش لاقي حد”.
اكمل زيزو بيانه: “محدش كمان اتكلم أنه ربنا سبحانه وتعالى أنعم عليا بعروض مقابلها المالي 10 أضعاف العرض اللي موجود، ورغم كل ده، قلت وهفضل أقول أنا منتظر كلمة النادي. ورد لاعتبارات كتير مش لتجميل الصورة.
وواصل نجم الزمالك:” الجماهير لازم تكون عارفة الحقيقة، زيزو مش بيزايد.. ولا بيتاجر.. لكن لازم الطرف الثاني يكون عايزني أكمل، وتكون فيه استجابة لحاجة من المعروض عليا على الأقل.. لكن للأسف الكلام معايا حاجة.. واللي بيتقال للإعلام حاجة تانية.. أنا مينفعش أجرح في حد ولا أتكلم في حق حد.. لأن اللي بيتقال في الجلسات عيب يتقال برة.. على الأقل من ناحيتي.. أنا مستني رد النادي لحد آخر يوم في الكونفدرالية.
واتم زيزو:” وأتمنى ربنا يكرمنا بيها أنا وزمايلي. وأي كلام هيتقال غير كدة في موضوع التجديد أو التوقيع قبل الموعد ده . هيكون كلام غير صحيح. ورسالتي الودية جدا للمسئولين في النادي اللي أنا بحترمهم جميعا، أتمنى الحوار في مسألة تجديد العقد يكون بيني وبينكم.. مش عن طريق الإعلام.. وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على اننا نكمل الطريق. شكرا على تفهمكم موقفي”.
