عمل مسلسلات كتير.. أول تعليق من مي عمر على اعتزال محمد سامي الإخراج
كتبت/ مي السايح
حلت الفنانة مي عمر ضيفة في برنامج “الحكاية” مع عمرو أديب عبر قناة mbc مصر، وكشفت أسباب اعتزال زوجها المخرج محمد سامي الإخراج التلفزيوني.
وقالت معلقة:” محمد واخد القرار من قبل رمضان هي الناس مش فاهمة هو عمل مسلسلات كتير والمسلسلات مرهقة جدا وكلها ناجحة، لما بعمل مسلسل بخلصه ببقى تعبانة ومش قادرة اشتغل أو اقرأ سيناريوهات، هو السنة دي عمل مسلسلين وكان كتير جدا عليه هو واخد القرار من قبل رمضان وقال أنا محتاج أريح وأخد إجازة وأرجع تاني”.
وتابعت مي عمر: “الموضوع ملوش علاقة باللي حصل المسلسلين مكسرين الدنيا ومخلصين رمضان الأول والتاني على شاهد، أنا ساعات كتير كنت بقوله متشتغلش رمضان اللي جاي وريح، المسلسل مش تصوير بس هو بيقعد يكتب ويحضر ويقعد مع الممثلين ويتابع ديكور وموسيقى ومونتاج، إحنا كممثلين الشغل بالنسبة لينا 3 أو 4 شهور هو بالنسبة ليه الشغل 9 شهور أو سنة مش بيلحق يعمل حاجة”.
واختتمت مي عمر كلامها: “هو عنده خطوة مهمة شغال عليها ويعمل الحاجات اللي نفسه فيها ويرجع تاني، هي خطوة فنية”.
يُذكر أن، آخر أعمال المخرج محمد سامي مسلسل “إش إش” وهو من بطولة مي عمر، ماجد المصري، انتصار، إدوارد، هالة صدقي، دينا، شيماء سيف، طارق النهري، عصام السقا، علاء مرسي، محمد الشرنوبي، ندى موسى، إيهاب فهمي، حمدي هيكل، أحمد عبدالله، وعدد من ضيوف الشرف وهم: محمد ممدوح، خالد الصاوي، محمد عبدالرحمن، أحمد زاهر، والعمل من تأليف وإخراج محمد سامي.
