زينه تكشف لأول مره تفاصيل ولادتها في أمريكا

كتبت/ نهى مدحت

كشفت الفنانة زينة عن كواليس ولادتها للتوأم في أمريكا خلال استضافتها في برنامج ABtalks مع الاعلام الإماراتي أنس بوخش عبر قناته الخاصه على يوتيوب، وقالت زينه أنها كانت بمفردها أثناء ولادتها للتوأم في ولاية كاليفورنيا بأمريكا، وأنهما أصيبا بالكثير من الأمراض منذ الولادة.

قالت زينة:” أنا شفت حاجه مفيش بني آدمين يقدروا يتجاوزوها مرحله إنك تولدي لوحدك في الغربة وأولادي كمان اتولدوا عيانين قوي، كانوا بيكتفوني عشان يغيروا لي على الجرح عشان كل يوم بنكتشف مرض جديد ليهم، كنت عاوزه اشبع منهم على قد ما اقدر عشان لو جرى لهم حاجه”.

تابعت:” كانوا في المستشفى بيفتكروني مش طبيعية وجابوا لي شيخ ودكتورة هندية، كنت بكلمها هي الوحيدة بالعربي عشان كنت بطمن لها كانت حنينه عليا، وهي مكنتش بتتكلم عربي جابوا لي مترجمه وعرفتني إن أنا زينة الممثلة ،وقالت لي أن هما عاوزين ياخدوا عيالي، وكانت بتقولهم في المستشفى إن أنا ممثلة مشهورة في مصر وماكنوش مصدقين”.

تحدثت زينه عن أسلوبها في تربية توأمها قائله:” المرحله اللي أنا فيها دي هي أصعب مرحله في حياتي، بسبب ولادي كل مرحله من مراحلهم بحس أنها صعبة ومش عاوزه تعدي وطول الوقت خايفه، وكمان انا معنديش الإيمان اللي كان عند اهلنا ان هم مطمنين، وبحس ان أنا كنز مع ولادي وبهزر معاهم كأني واحد صاحبهم معتقدش إن في حد زيي أنا كمان بخليهم يحترموني في نفس الوقت”.

أعربت زينة عن حزنها الشديد لرحيل والدها قائله:” أي حد عاوز يقرب مني بيعمل نفسه زي بابا من كتر حبي ليه، وأنا كنت بنخدع بده كتير، ومش قادرة أتعامل مع موضوع وفاة والدي لحد دلوقتي، بالرغم من أنه توفى من فترة كبيرة، ودايما بفتكرله كل حاجه حلوه، وكان حنين وعشان كده تعبت أوي بعده ولحد دلوقتي بحتاجه ، عمره ما صربني ولا حرمني من حاجه، أنا كنت بخاف أغلط عشان مزعلوش”.