إيمان العاصي: لازم يبقى في قانون إن مش أي حد من حقه إنه يخلف

كتبت/ نهى مدحت

 تحدثت الفنانة إيمان العاصي خلال لقائها في برنامج أسرار النجوم مع الإعلامية إنجي علي عبر إذاعة “نجوم إف إم”، أنها تتمنى تعديل بعض قوانين الأسرة. 

وتابعت إيمان:” قانون نفسي يتحط أن يكون إجباري في دكتور نفسي يقعد مع المقبلين علي الزواج، الجواز مسئولية رهيبة، ولازم يبقى في قانون مش أي حد من حقه أنه يخلف ما ينفعش إني يبقى أنا مش معايا قوت يومي وأروح اخلف، لازم يتعاقب ده عدل ورحمه مينفعش أجيب مخلوق في الدنيا، وأنا مش قادر أكله وأودية مدرسه والبسه عشان أحس بالأمومة دي أنانية رهيبة”.

 وأضافت:” في قانون نفسي يتغير قانون تعنيف الأسرة، ربنا ادانا الأطفال هم مش ملاك دي أمانة في وقت من الأوقات بتسلمهم للحياة بعد ما نكبرهم ونربيهم ونعلمهم ده دورنا لكن الأهالي اللي بتعذب عيالها عذاب مينفعش يتحكي، اللي يفكر أنه يؤذي مخلوق معندوش قدرة يدافع عن نفسة وأي راجل بيضرب مراته نفسي يكون القانون يبقى عادل وقاسي جدا، عشان محدش يفكر أنه يتحكم في حياة إنسان أو يعذبه”.

 وأكملت العاصي:” القانون اللي نفسي اشيله هيكون له علاقة بقانون الاسرة لأنه في ثغرات كثير مثلا أم تخطف عيالها من أبوهم، أو أب يخطف العيال وما يوريهمش للأم، القانون لو روحتي تقديمي بلاغ هيتقال ما فيش أب بيخطف عياله، طبيعي لكن لكل قاعدة شواذ في الحالة دي لما النيابة تتحرك هتعرف انه خطف، الأم أو الأب مش عارف يوصل لأولاده، نفسي يتحط قانون الأهالي الذي يحرمون الأولاد من حياة طبيعية”.

 ومن جانب آخر يعرض حاليا للفنانة إيمان العاصي مسلسل “برغم القانون” عبر منصة watch  it وقناة ON .

“برغم القانون” حقق نجاحا كبيرا منذ بداية عرضه، ويشارك في البطولة إيمان العاصي، هاني عادل، محمد القيس، وليد فواز، عابد عناني، رحاب الجمل، عايدة رياض، وعدد آخر من نجوم الفن، إخراج شادي عبد السلام، تأليف نجلاء الحديني، إنتاج الشركة المتحدة، وشركة فنون مصر للمنتجين ريمون مقار، ومحمد عبد العزيز.