مش عايز أختي يبقى شكلها وحش ورضيت بالظلم لوحدي.. تصريحات شقيق شيرين عبدالوهاب
كتبت/ مي السايح
علق محمد عبد الوهاب شقيق الفنانة شيرين عبد الوهاب، على الاتهامات الموجهة إليه من قِبل شقيقته، وتقديمها بلاغا رسميا ضده تتهمه باستغلالها والتنازل عن حساباتها ع السوشيال ميديا لصالح أحد المنتجين بموجب التوكيل الشخصي له، وذلك عبر حسابه الرسمي على الفيسبوك.
قال عبدالوهاب: “كل واحد عنده قدرة على تحمل الأذى لكن للقدرة دي حدود.. ده قرار النيابة العامة بالحفظ إداريًا في كل الاتهامات اللي اتوجهت ليا بتاريخ 19/12/2022 يعني من سنتين”.
أضاف مستكملاً : “ايه هي بقي الاتهامات دي؟ كسر الضلع والعشرين راجل اللي دخلت بيهم على اختي! وطبعا موضوع السكينة! واتسألت علي التوكيل بتاعي وبتاع امي من وكيل النيابة المحترم وكله مثبت، س سوال ج جواب. التوكيل اللي بتقول ان انا أسأت استخدامه!”:
استكمل حديثه: “وده إن دل على شيء فهو يدل على إني مش عايز أختي شكلها يبقي وحش قدام الناس وقدام جمهورها والأهم أمي اللي كنت مفهمها ان بنتها اتنازلت وانا أستحمل أي حاجة إلا إنها تتوجع في ولادها”.
أضاف : “وبناء عليه رضيت بالظلم لوحدي لكن الحقيقة غير كده، انا اتطلبت في النيابة واتسألت رسمي وتم اخلاء سبيلي من النيابة على ذمة القضية لحد مااتحفظت القضية بس انتي بقي بشطارتك وبأهل الشر اللي حواليكي اللي خسروكي نفسك وأهلك، خليتيني انهارده أطلع أقول جزء من الحقيقة للناس رغم إن ده آخر حل كنت أحب ألجأ ليه. وده حق ربنا لا ظلم ولا افترى”.
تابع عبدالوهاب: “ونفس الكلام اللي من سنتين بيتعاد تاني معرفش لمصلحة مين مع اني بعيد عنك وعن حياتك من سنين قبل الواقعة وسنتين من بعدها. ده قرار النيابة العامة الموقرة في الافتراءات اللي اتوجهتلي، مش بيان من محامي، وأي حاجه هرد بيها هتكون مستند حكومي عليه ختم النسر”.
يُذكر أن، تقدم المحامي ياسر قنطوش، دفاع الفنانة شيرين عبد الوهاب، ببلاغ للنائب العام ضد شقيق الفنان لاتهامه باستغلال توكيل قديم كانت شيرين مضت عليه بموجب الأخوة بينهما، وتعاقد مع محمد الشاعر دون علمها والذي استولى على السوشيال ميديا الخاصة بها.
