زينة: “باسم سمرة عنده علاقة مع الورد وكل ما يشوفني يقولي عمو سامي”
كتبت/ نوران عسكورة
أوضحت الفنانة زينة كواليس جمعتها بالفنان باسم سمرة خلال تصوير مسلسل “العتاولة” الذي تم عرضه في الموسم الرمضاني 2024، كاشفة عن علاقة غريبة لباسم سمرة مع الورد وحبه الشديد له لدرجة اشتراطه على الإنتاج أن يحضروا له وردًا يوميًا.
قالت زينة: “باسم سمرة عايش بالورد، هو كاتب في العقد شرط وهو إن كل يوم الإنتاج لازم يجيبله بوكيه ورد، ده شرط غريب جدًا عمري ما شفت ممثل بيعمل كده”.
أضافت: “ده راجل لذيذ أوي وبعدين لما أنا وهو بقينا أصحاب أوي، بقى كل يوم يجيبلي ورد عشان عارف إن أنا بحب الورد، وأنا الصراحة عمري ما حد جابلي ورد، وهو دخلي من نقطة ضعفي”.
تابعت زينة: “كل يوم يجيبلي الورد ويجي يقول لي بُخيه بالمياه زي المكواجية عشان الورد يحبك، فاكتشفت إن باسم سمرة عنده علاقة مع الورد مع إنه ميبانش عليه خالص، ده شكله مش بتاع ورد خالص ولا رومانسي خالص وكل ما يشوفني يقولي عمو سامي”.
كشفت زينة كواليس تقليدها هي وباسم سمرة فيديو عمو سامي الذي انتشر بشكل كبير على التيك توك قائلة: “باسم سمرة كل ما يشوفني يقولي عمو سامي، وأنا ماليش في التيك توك أوي ولكن فتحت التيك توك مخصوص بسبب الموضوع ده”.
اختتمت الفنانة حديثها قائلة: “فيه مرة علي حسن المنتج الفني للمسلسل خدنا يوم نفطر بره وقال لي شوفيه دلوقتي، ولما شفته ضحكت قالي تعمليه وفعلًا عملته مع باسم لقيته قلب الدنيا، استغربت وقلت إزاي ده أنتم مش مشيرين مشاهد المسلسل كده، وقعدنا نضحك وقالي لما أقولك على حاجة تسمعي الكلام”.
