اللي بيحصل ده مهزلة.. سمية الخشاب تهاجم رامز جلال بعد إصابتها بتمزق في الأربطة
كتبت/ مي السايح
هاجمت الفنانة سمية الخشاب برنامج “رامز جاب من الآخر”، كما صرحت بأنها ستقوم برفع قضية على البرنامج، وذلك لإصابتها بالتمزق في الأربطة أثناء وقوعها خلال البرنامج.
قالت سمية الخشاب في برنامج “تفاعلكم” أنه يوجد الكثير من المشاهد المحذوفة من حلقتها وعلقت: “هما قصوا كتير جدا ليا وأنا بقول رجلي بتوجعني وكتفي وجعني، ولحظة وقعتي كانت وقعة قوية بس هو قص كتير عشان ميبانش إن أنا اتصابت .. وأنا عندي تمزق في الأربطة في رجلي في كتفي ومش بعرف أحرك إيدي بارتياح”.
تابعت حديثها قائلة: “اللي يزعل ان ولا حد منهم كجهة انتاجية اتصل بالناس وقال سلامتكم أو أسف. هو احنا في غابة يا جماعة؟ مش مهم الناس يحصلها ايه المهم أطلع أنور وأعمل مشاهدات عالية؟ المهم مصلحتي والباقي يتحرق؟ ايه اللي بيحصل ده مهزلة لا يمكن السكوت عليها، الناس تتؤذي في صحتها”.
أضافت: “ما أنا عملتها معاه 4 سنين قبل كدة بس كنت عارفة إيه اللي بيحصل لكن المرة دي متقالش، عشان في تعمد للأذية يبقى انت كدة متعمد تؤذي الناس، دي جريمة يعاقب عليها القانون. قالي إنه برنامج عادي فورمات”.
واستكملت حديثها: “متأكدة ان في تعمد في الأذية والدليل إن مفيش حد اهتم إنني اتصابت، ولما رحت للمستشفى قالولي انت مش أول حالة، امبارح جالنا 3 حالات من عند رامز. أقل حد اتصاب حصله كدمات متعددة في جسمه”.
تابعت الخشاب حديثها قائلة : “معقول انتوا عارفين بتكسروا في الناس كل يوم ومكملين تصوير؟ وقال أصل الناس ماضية على إنهم موافقين على جميع الملابسات والظروف الخاصة بالبرنامج. يعني ايه؟ أنا موافقة إنني اتكسر؟ أصلا مفيش عقد بيننا بس لو حتى فيه عقد، جسمنا دة مش ملكنا، دة ملك ربنا، فمش من حقك تؤذي جسمي صحيا ونفسيا وعصبيا، فدة ضد حقوق الانسان وضد القانون”.
اختتمت حديثها: “أنا رفعت قضية قضية فعلا ومن تاني يوم وأنا عاملة إجراء وفي طلب للنائب العام إن ينظر للموضوع. أنا متأكدة إن في ناس اتصابت ومش عايزين يقولوا عشان خايفين MBC تزعل منهم بس هي قناة محترمة وهي بتعرض البرنامج ومش الجهة المنتجة له. انا يعني صحتي دي محدش هيزعل عليها؟ كله إلا الأذية”.
