أيتن عامر تكشف أسرار حول حياتها مع طليقها
كتبت / شهد الشرقاوي
جاءت الفنانة أيتن عامر ضيفةً مع الإعلامية بسمة وهبة، في برنامجها العرافة، وتحدثت خلال الحلقة عن العديد من الموضوعات، حول حياتها الشخصية، وخلافها مع طليقها محمد عز العرب.
كشفت أيتن عامر خلال حلقتها: “أي اتنين بينفصلوا أكيد بيبقى فيه بينهم خلافات، بس مش كل حاجة بتبقى صح وفيه ناس بتفبرك عناوين عشان الريتش، وأنا من جانبي اتنازلت عن حقي، لأن أنا وأبو أولادي مش هنقف قدام بعض في المحاكم أبدًا”.
تابعت: “ومفيش قضايا بيني وبين عز أبدا دلوقتي، ولكن لكل فعل رد فعل، ولما حد يرفع عليا قضية ما، طبيعي إني هرد، وأنا دايما في موضع دفاع، عمري ما كنت في موضع هجوم، ومعرفش عدد القضايا اللي هو رافعها عليا من كترهم، وبرغم إننا انفصلنا، بس هنفضل لآخر يوم في عمرنا ناقر ونقير”.
أشارت أيتن عامر: “وبرغم كدة لسة في مساحة احترام بينا لأننا موقفين المشكلة عند حد معين ومش بنكبر المواضيع، والناس انتقدتني لما قولت لـ ياسمين عبد العزيز الناس ملهاش علاقة انتو اتطلقتوا ليه، وتجربة الطلاق دي من أبشع التجارب اللي ممكن ست تمر بيها في حياتها”.
أكملت: “والست ممكن تنور بعد الطلاق بس مش عشان اتطلقت، هي كانت منورة من قبل كدة بس يمكن كان عندها حتة اُستنزفت ورجعت نورت تاني، لكن عموما الطلاق مش حاجة كويسة ومش سهلة وتجربة صعبة”.
أضافت أيتن عامر: “الست عمرها ما كانت مسئولة عن خيانة الراجل، ولما وفاء عامر أختي قالت إن الست هي المسئولة، اتخانقت معاها لأن ده مش صح، الراجل بطبعه كدة، وإلا مكنش ربنا حللهم التعدد”.
