لما عملوه الأتراك اتكلموا تركي.. بيتر ميمي يرد على انتقادات مسلسل الحشاشين

كتبت/ مي السايح

علق المخرج بيتر ميمي، على إنتقادات على مسلسل “الحشاشين”، حول إستخدام اللغة المصرية العامية، في مسلسل تاريخي، وهوجم المسلسل بسبب الأخطاء التاريخية فيه.

كتب ميمي عبر حسابه الرسمي على الفيسبوك:”طيب كل سنة وإنتم طيبين، مع إنى مكنتش حابب أتكلم علشان دول كلهم 4 حلقات! مبدأيا المسلسل من وحي التاريخ وده مكتوب نصا فى التترات يعنى مش وثيقة تاريخية لكنه دراما تاريخية، هو المخرج العالمي تارنتينو لما قتل هتلر فى السينما كان حقيقة؟ أو نابليون فى فيلم ريدلى سكوت الأخير هل ده نابليون اللى فى كتب التاريخ؟ ديه دراما تاريخية”.

تابع المخرج: “حاولنا نعمل خيال لفترة من الفترات لكن فى شكل درامي.. لكن رجعنا فى الديكور والملابس لمراجع كتيرة ونادرة علشان نعمل عالم مشوفنهوش قبل كده وميكنش شبه أفلام أو مسلسلات عالمية”.

استكمل حديثه قائلا: “هل ده حسن الصباح؟ مفيش كتاب اتفق على حسن الصباح لأن المغول حرقوا القلعة وكتبه وأفكاره والموجود اجتهادـ ماركو بولو أو فلادمير بارتول أو برنارد لويس أو فرهاد دفترى… وكتير جدا، حسن الصباح كان بيعمل معجزات؟ لا طبعا!!! و ده تباعا مع الحلقات هيتفهم”.

كما علق على استخدامه اللغة العامية: “الحشاشين مسلسل تاريخي بالعامية المصرية، الأحداث بين أتراك وفرس لما عملوه الأتراك اتكلموا تركي ولما عملوه الأمريكان بيتكلموا إنجليزي، إحنا عاملينه فى مصر والترجمة موجودة فى كل بلد، المسلسل بيتعرض فى روسيا وأمريكا وكتر من بلد كل بلد بلغتها، هم الڤيكنجز كانوا بيتكلموا إنجليزي؟ ولا ويليام والاس كان بيتكلم اللكنة الأمريكية”.

تابع: “ليه حسن الصباح؟ حسن الصباح شخصية فذة وغريبة ومستفزة إنك تعرف عنها مش لازم يكون رمز للخير علشان يتعمله مسلسل هتلر وراسبوتين كانوا فى منتهى الشر لكنهم شخصيات فذة غيرت العالم أو على مستوانا المصرى خط الصعيد أو سفاح إسكندرية”.

وأكمل حديثه موضحاً: “حاجات صغيرة:

• أم الخليفة رصد كانت نوبية الأصل
• إسكندرية مدينة فى مصر .. لأن فى مدن كتير باسم إسكندرية حوالين العالم لزم التوضيح للترجمة لأن فيه غير مصريين بيتفرجوا على المسلسل.
• مجاعة القاهرة الفاطمية مثبوتة تاريخيا لكن تعددت أشكالها حسب المصادر وهي على فكرة كانت قبل وصول حسن بفترة مش بعيدة بس ديه دراما (من وحي التاريخ).

اختتم حديثه قائلا: “كل سنة وأنتم طيبين وسعيد أن المسلسل خلاكم تقروا وتسألوا .. وشوية شوية هتفهموا المسلسل صحصحوا معانا كده يا شباب خلونا نعمل شكل جديد وتبقى بداية ومع الوقت يتعمل أفضل وأكبر وأحسن من اللي إحنا عاملينه ومع الوقت ننافس”.

المسلسل بطولة كريم عبد العزيز، فتحى عبد الوهاب، ميرنا نور الدين، أحمد عيد، إسلام جمال، نيقولا معوض، سامى الشيخ، ميمى جمال، عمر الشناوى، نور إيهاب، سوزان نجم الدين، نور محمود، أحمد كشك، ياسر علي ماهر، بالإضافة إلى عدد من الفنانين ضيوف شرف، تأليف عبد الرحيم كمال، وإخراج بيتر ميمى.