بعتذرلك أني اعتدت وجودك في حياتي.. رانيا فريد شوقي بكلمات مؤثرة لأختها الراحله
كتبت/ آلاء الدهشان
اعربت الفنانة رانيا فريد شوقي، عن حزنها بعد فقدان أختها ناهد فريد شوقي، والتي رحلت عن عالمنا يوم الثلاثاء الماضي.
شاركت رانيا فريد شوقي، صورة عائلية تجمعها بأختها ناهد فريد، عبر حسابها بموقع “انستجرام”، قائله: “للأسف بنعتاد الأحباب في حياتنا كأنهم خالدين في الدنيا زي ما نعتاد النعم كأنها مستمرة الي الأبد و ده من عيوب البشر”.
أكملت قائله: ” أختي الحبيبة الغالية ناهد انا بعتذر لك لأني اعتدك في حياتي يمكن خيالي كان اضعف من إني اتصور فراقك يمكن خدتنا مشحانات الدنيا و ربنا نور بصيرتنا و رجعنا لحضن بعض و الحب اللي اتربينا عليه و حبنا لبابا كان دايما بيجمعنا يمكن لاني تنسيت اننا بنكبر كلنا يمكن لأني جيت الدنيا لقيتك اختي الكبيرة القوية العنيدة اللي ماتعرفش حاجة اسمها استسلام و ارادتها من حديد قوتك كانت بطمني عليكي”.
أضافت فريد: ” انا مش عارفه انا بكتب ايه بس اللي حساه اكبر بكتير من أي كلام مازلت مش مستوعبه و لما حد بيقول الله يرحمها بتخض في الفترة الأخيرة كنت بشوف فيكي بابا بكل حركاته و طريقة كلامه و نظراته و هزارك و قولت للاحفاد اللي ماشفوش جدهم ناهد بقت نسخة من جدكم لما تشفوها كأنكم شفتوه”.
أنهت رانيا حديثها قائلة “سبحان الله و الغريب اني من الشخصيات اللي بتخاف تدخل علي حد متوفي لانه بيبقي آخر انطباع بيفضل في الذاكرة عن الشخص لكن لما دخلت و شوفت وشك مبتسمه كأنك نايمة و بتحلمي حلم جميل حسيت انك شوفتي فريد ابنك بيستقبلك و خدك لحبايبك بابا و طنط هدي و مها أختنا ده تفسيري لابتسامتك الهادية الجميلة الواضحة اوي اللي هونت علينا كلنا فراقك و اللي مش هتفارقني اللي باقي من عمري كنتي راضية بكل اقدار الله و مسلمه أمرك لله إلي ان نلتقي يا اختي سلميلي علي بابا و قوليله الحياة من غيرك مش حياة و نفسي يجيلي في الحلم بقاله فترة غايب عني هتوحشيني اوي يا حته من ابويا و من قلبي”.
يذكر أن جنازة المنتجة ناهد فريد شوقي، قد شيعت من مسجد الشرطة في الشيخ زايد، وسط حضور عدد كبير من النجوم.
