بوسي تنفي أنباء طلاقها وتؤكد أنها شائعات
كتبت / آلاء رضا
انفصل رجل الأعمال هشام ربيع والمطربة بوسي، بعد زواج دام عامًا واحدًا، وذلك بعدما تم حبسه بسببها لمدة 4 شهور، مشيرًا إلى أنها لم تقف بجانبه في محنته.
قال ربيع خلال تصريحات خاصه له: “حصل بالفعل الانفصال بيني وبين بوسي، وده بعد ما خلصتلها الموضوع بتاعها زي أي راجل مصري، وأي راجل مراته هتتعرض لابتزاز أكيد مش هيسكت”.
أضاف: “وأنا جبتلها حقها تالت ومتلت، وأي راجل مصري وحر مش هيسمح إن حد يبتز مراته”.
كشف عن الأسباب التي أدت بهما إلى الانفصال، قائلًا: “إحنا من ساعة ما اتجوزنا والدنيا مش لطيفة ومش حلوة، والمشكلة اللي حصلتلي كانت بسببها واللي اتأذوا فيها كانوا ولادي ووالدتهم، ومحدش وقف جنبي غير أم ولادي وده اللي زعلني من بوسي، هي موقفتش جنبي خالص”.
تابع ربيع: “ملقتش اللي كنت منتظره من بوسي، أنا اتسجنت بسببها أربع شهور وطبعا كانت قضية ملفقة، كانوا بيبتزوها وعايزين فلوس وأنا طبعا لن أسمح بده، فملاقوش قدامهم غير إنهم يعملولي مشكلة”.
اختتم حديثه قائلًا: “أنا ملقتهاش جنبي، فين الحب؟ أم ولادي كانت يوميًا بتنزل تتابع الشغل وتجيبلي أكل وهي في الآخر عيّلة عندها 30 سنة”.
وفي سياق متصل، نفت المطربة بوسي، كل ما تم تداوله من أنباء انفصالها عن هشام ربيع، مؤكدةً أنها شائعات، من جانبه علق هشام ربيع على نفيها لهذا الخبر، قائلًا: “معرفش هي بتنفي ليه ممكن يكون إحراج أو حاجة”.
