دول هما اللي خلوك تكون موجود.. تعليق إياد نصار على أزمة عمر متولي وأسرة شكري سرحان
كتبت/ مي السايح
حرص الفنان إياد نصار على التعليق على أزمة الفنان عمر متولي مع أسرة شكري سرحان، وعلق قائلاً بأن كل الممثلين السابقين هم من صنعوا له حلم التمثيل منذ الطفولة.
وقال إياد نصار خلال لقائه في برنامج “حبر سري”: “بالنسبة ليا كل جيل قبلي هما اللي صنعوا ليا الحلم لما وعيت على الدنيا وحبيت أبقى ممثل أنا كنت شايف نور الشريف ومحمود عبد العزيز وأحمد زكي، كنت شايف عبير عيسى وربيع شهاب من الأردن، دول اللي خلقوا ليا الحلم وخلوني عايز أبقى ممثل وليهم الاحترام في صناعتي أنا كممثل وبالتالي مينفعش ممثل يقول أي شيء عليهم لأن دول هما اللي خلوك تكون موجود”.
وتابع إياد نصار: “مش بحب أصادر على رأي حد كل شخص من حقه يقول رأيه، لكن أوقات بيحصل اجتزاء للفكرة أو متكونش ناضجة داخل دماغ الفنان فبيقولها بشكل هو مش قاصد يجرح”.
وأكمل إياد نصار:”مثلا السينما العالمية لما انتهت السينما الصامتة ودخل الكلام كان الممثلين لسه متأثرين بالمسرح فكان في طريقة تمثيل مش الحديثة لكن دي المدارس اللي فضلت وتحركت وغيرت طريقة التمثيل، في مرحلة من المراحل الممثل في السينما المصرية كان في شيء من التمثيل المسرحي بس هل مكنش في صدق وحالة حب واللمعة الموجودة في عيون الممثلين بالأبيض والأسود بتمنى تكون عندي، مش مبالغ كبيرة وفلوس في حب وعشق للمهنة، تحترمه وتقول دا اللي خلق لي الحلم، أنا أعتقد خانهم التعبير، التمثيل اتحرك في العالم كله”.
يُذكر أن، عمر متولي استضاف الفنان أحمد فتحي في واحدة من حلقات برنامجه “ليك لوك” ووجه له سؤالا جاء فيه: “مين تحسه في تاريخ السينما المصرية نجح أوي بس بنسبة كبيرة مش موهبته كانت ببركة ربنا؟”.
ليرد عليه أحمد فتحي: “معظم جانات السينما المصرية”، فيعود عمر متولي ويضيف قائلا: “أنا كانت إجابتي على السؤال دا شكري سرحان”.
ليضيف أحمد فتحي: “كله صغيرين وكبار، ممكن تبقى الموهبة مبططة لكن هو نجم شباك وجان”.
